سؤال بلا جواب

طيّب بليز حدا يفسّرلي ليش إذا اللبناني حكي بمصلحة وطنو صار أوتوماتيكـلي تابع لبلد تاني، صديق أو شقيق أو عدو؟

وإذا كلّنا كلبنانيّين بدنا ذات النتيجة ليش عم نختلف على إشيا سخيفة وتافهة ومش وقتا نختلف عليها أصلاً وبلدنا واقف على سوس ونقطة؟

إنو عن جدّ بدنا سيادة وحرّية وإستقلال و.... شو إسمو هيدا يلّي دارج هلأ؟ إيه مظبوط، "تعايش مشترك" وأكيد ما بستثني الوحدة الوطنيّة... ولاّ مبسوطين نلفظن كلمات كبيرة عالرّايح والجايي تنحسّ حالنا مهمّين و منفهم؟

معقول يكون دم شهدا اللإستقلال الأصلي راح هدر ودعس تحت إجرين زعما هالعصر؟
ويكون تمثالهن بالبلد صار محطّة تعبير عن إختلافاتنا التافهة من بعد ما عملنا منّو حصن ورمز لوحدتنا ضد الإضطهاد والوصاية مش من زمان كتير؟

معقول يكون كل شغل وتعب الألفين وخمسة انتسى بهالسرعة، وأرواح اللي ماتو ما إلها معنى ولا قيمة؟

ذكرى ولادة رب الأكوان المبشر بالحب والسلام جايي بعد كمّ يوم، بسّ مدري ليش الجو بيوحي بالجمعة العظيمة وخيانة يهوّذا والهلاك... وهيهات نشوف سبت النور وأحد القيامة عن قريب